DEPARTEMEN PERHUBUNGAN

Dizamanna i, molo nunga didok mulak pangartto sian Jakarta, pekanbaru dohot sian batam. ditikki ari natal nang ditikki tahun baru, tung mansai na angur do tahe goar nasida, sai pittor adong do anggapan ni nadihuta naung hasea, naung denggan akka parngoluon nasida nadi tano parserahanan. Marragam do ulaon ni halak hita pangarattoan on. Karejo di pemerintahan, perusahaan, polisi, te...ntara, pengacara, nang pengusaha. Dibidang entertaimen manang hiburan isara ni parende, parrestoran/lapo nang dia matahe sibahen dalan i ngolu ditano parserahan on. Alai nang pe tung dao na mangaratto i, ai anggo halak hita sai sihol dorohana mulak, sihol mamereng huta hatubuan jala sai dipear do agiat pala sahali tolu taon mulak, ia soboi tiap taon.

Songoni do nang si Jatinggil . Nunga tutu mar lima taon ibana dang mulak, mardomu ala dibagian departemen perhubungan do tugas ibana, ima departemen perhubungan darat.

Sahalak na doli-doli na gatteng, pattun makkatai jala malo.

Disada tikki, ditahi ibana ma mulak tu hita an, jala toho do i nunga tung leleng ibana naso mulak i. dapot ma diarina mulak ma ibana mar pesawat do, songon na jago ma idaon gaya ni ibana, mardomu jolma na ganteng, na bottar pamatangna, jala na ias berengon. Dituhor do kassa mata na birong sian pasar ular Tj. priuk jala sipautuna na ganjang jala tajom tujolo i pe dituhor ibana do sian Pasar Senen. Dung sahat ibana di Polonia Medan, sangajo do ditempelhon ibana Tikket na dohot tikket ni tas na i disileting ni koper na i. Asa tutu tanda ma ibana marpesawat LION AIR sian Jakarta, jala dang hatinggalan hempon on digottingna.

Sahat do ibana tu hutana, jala nung tung mansai las roha ni natua-tuana, hipas dibereng si Jatinggil jala muse nunga denggan ngoluna di Jakarta. Diseat do manuk jabbe bolon lao panganonna, jada diundang do nang akka hobbar jabuna, ala hipas do si Jatinggil mulak tu hutana. Songoni ma nang diari mingguna i, borhat do nasida saripe mandapothon tulang ni si Jatinggil dibariba huta i, ima mangido tangiang asa boi nian ibana naik akka pangkatna di departemen perhubungan i.

Dipaboa ibana do tu tulangna na di DepHUb do ibana karejo, jala tutu diboan ibana do sipanganon na tabo tu tulangna i, diboan siinumon na tonggi, huhut dijalangkon ma sihumisik tu tangan ni nantulang na i andorang mulak nasida sian jabu ni tulang na i. Tutuma antong, anak ni amana ma ibana hatihai.

Borngin i, nunga lao ibana tu lapo na adong dihutai, pajuppa dohot donganna saparmeaman najolo. Tung mansai ribur ma tikki i, kaluar ma akka minuman ni parlapo i, jala sampe suda jala dang sae inumon ni nadilapo i. Sai tuminggil ma sipareon ni jolma i molo nunga si Jatinggil parsuhutan. Ai diboto ibana do songon dia keadaan ni politik ni negara on, sahat do tu rencana pembangunan lima taon nai. Jala molo ditaringoti artis-artis na tarida di tipi ni parlapo i, ittor boi do dipatorang ibana, ise i, didia jabuna, jala akka dia pilim naung dibintangi ibana. Apalagi molo ditaringoti tu kecanggihan ni teknologi sisaonari, pittor dipatudu do hemponna i, ai didok ibana ido keluar na umbaru merek sisongoni, jala sian singapura do dituhor ibana i.

Sasahali, songon na martelepon ma ibana, marbahasa indonesia, jala sai maotokkin do mangkkuling hempon on, dungi attar lao ibana tu luar, huhut sai dipagogo manghatai.

Tarbortik ma tu sipareon ni ibana, na adong disi anak boru na bagak, ima apala boru ni kappung dihuta i, jala didok donganna na minum di lapo i, nunga pola piga halak muttul sian itoan i martandang, dang diengkos. Jala didok donganna on rupani, nauli do itoan i, tamatan sian kuliah di medan, jala baru tammat dope muse. Ganjang obutna, uli bohina, timbo muse jala malo.

Didok donganna ma tu ibana ” Suba ma jo lae manandangi itoan i, songon na sossok do hu ida hamu, ganteng doho, itoan i uli..”

“Ah…lae on nian,..dia ma sossok i tu anak ni napogos” ninna ibana, huhut manuankkon bir i muse tu dongan na mandokkon hata nakkaing.
“Boha tutu lae, anggo boi do mangoli ma lae, olo do itoan i, anggo tu hami parhuta-huta on nunga muttul be…hape lae daba parkota jala nunga hasea muse”

Sai manginongi ma dibagasa rohana, boha tutu naeng haulion ni boru nikapung i, sai tok didokkon halakon ikkon tandangan?. Nisuba majo, ninna rohana dibagasan. Marsogotna i, borhat ma ibana dohot donganna tu jabu ni kappung i, jala songon na biasa ma gaya ni ibana, sigaret Malboro di sihambirang, maniop hempon siamunna. Hape sigaret na isi-ulang do. Holan bukkusna nama Malboro, anggo isina nunga union pilter be.

Denggan do tutu dijalo kappung harorona, ala diboto do ise si Jatinggil, sahalak doli-doli pangaratto naberhasil di Jakarta, jala dung didongani kappung on si Jatinggil marnonang songon na yakkin jala lomo rohana parhelahon ibana. Nang boru na i pe, tong do lomo rohana marnida si Jatinggil, ai dipapuji-puji do ibana, dirayu jala sipata dipanotnoti ibana ma borua i. Songon sahalak parkota nasida nadua, molo marnonang nasida sai tor marbahasa indonesia do.

” Kok abang mandangin saya terus sih, jadi malu nih…” ninna itoan i ala sai dipanotnoti si Jatinggil ibana. Dungi tabo do attong alus ni si Jatinggil do ma

” Iya nih dek, saya heran, dan penasaran, gimana yah, kok Tuhan itu bisa menciptakan sesosok wanita yang seperti adek di dunia ini, saya sudah keliling dunia, tapi kok hanya dikampung ini saya temuin wanita tercantik. Sepertinya Tuhan mengabulkan doaku mempertemukan aku dengan bidadari” dungi songon namarrara ma bohi ni itoan i, huhut ma sonang dihilala jala mallobok ma taroktokna.

Didok ibana muse “Hati-hati dek, kalau keluar malam, nanti dilihat bidadari dari atas, kau di kutuk, mereka iri dengan kecantikanmu” ninna. Mallabab ma holong ni itoan i.

Balik arina muse, nunga lam jotjot nasida martandang tusi, jala kappung on pe nunga dapot rohana dia sakkapni ibana. Didok si Jatinggil ma hatana tu itoan i, huhut ma sai dipapuji-puji. Ala nunga tong balga rohana tu itoan i, dipatolhas ma hatana mangarahon muli, “Adek, rasanya dunia ini berhenti berputar dan matahari jadi terbit darri barat kalau sedetikpun jauh darimu”

“Maksud abang??” ninna itoan i, songon na penasaran di umpama na binahen ni si Jatinggil.

Dimula nai dang porsea jala dang tor mangoli itoan i, songon sada boru ni raja ibana, adong do keraguan di ibana. Alai, si Jatinggil pe dang habis akkal mangarayu, didok ibana ma ” Kalau kita jadi menikah, adek akan jadi seorang putri raja, kita akan ke jakarta, kamu akan senang, disana tanah abang luas, mobil abang juga ada, nanti adek nggak usah kerja.

Sian na ragu hian, gabe porsea ma ima anggo itoan i, ala didok bolak tano dijakarta jala adong mobil mercyna. Jala tarida do tutu, ai sigaretna pe na arga do, naso hea binereng apalagi ni isap ni akka doli-doli parhuta i. Jala dang mungkin ibana margabus, ima dirohani itoan i.

Tutu ma dah, jadi ma nasida marrumatangga, jala ribur do pesta i, tarlumobi ma natua-tua nasida tahe tung mansai las rohana. Soi nama idaon pesta i, baoana ganteng, dungi borua na uli, godang ma tutu halak mangauhon dibagas rohana. Adong ma namandok, ue tahe…sonang ma annon siborua i bahenonni si Jatinggil i di jakarta, ai nungnga hasea ibana. Adong muse mandok, ua piga-piga halak nian songon siJatinggil on ate, asa boi pinarhela. Tung mansai las ma tutu roha ni natoras ni si boru mambege angka hata ni dongan sahutana i.

Dibalik mingguna, nunga be di tahi nasida lao mulak tu pangarattoan on, jala tutu diboan ibana do dongan saripe na i, ima boru ni kappung. Alai mar Sampagul nama nasida sian tebing tinggi, ai didok ibana asa songon na santai hita didalan ninna, hape dang diboto naung suda do hepeng ni ibana, holan ongkos mulak tu jakarta naik bis nama.

Dung sahat dijakarta, diboan ma itoan i tu jabu kontrakanna di Bekasi, jala tutu akka dongan sakontrakan na pe tung longang do mamereng nunga mulak ibana mamboan niolina na uli situtu. Dang sangka roha nasida boi dapot si Jatinggil songoni li ni boru-boru hape ibana holan kenek do.

Manginongi do itoanon dibagas rohana, ala didok niolina namaora do, bilak tano dijakarta, jala marmecy, alai boasa dung sahat tuson, diboan tu kontrakan marsompitsompit, jala dia do artana i?. Ai holan lamari na sian kain i do anggo pangisi ni kontrakan i. Alai dang diparsoalhon itoan on, arop rohana, holan satokkin do nasida disi. Dimanogot na i, nunga mardungoan be nasida nadua, disukkun itoan ima dia do tano na bodang nanidok na i?? dia do mobil mercy i??. “Marsogot ma ta ida i anggi, karejo ma jo au ateh, nga dua minggu iba naso karejo i..” ninna si Jatinggil, alai niolina i nunga tung mansai murhing.

Marsogot na i muse, sai tong do i disukkun itoan i, andigan do hita lao tu jabutta, tutano jala tu jabu nanidok ni si Jatinggil. Nunga parbadaan be naro, ala sai songon na digabusi si Jatinggil niolina i. Diboan ibana ma marbus itoan i tu Jakarta Pusat, dungi holan sahat di Tanah Abang, didok si Jatinggil ma ” Nion ma nanidokna TANAH ABANG, mulai sian adui sahat tu adui, tanah abang ma on, bereng ma tudu-tudu ni dalan i, nda TANAH ABANG do disurathon??”

“Maksudmu dang tanomu on?”

“Daong dah…..nandigan hudok adong tanokku di jakarta?”

“Bah…ai didok ho bolak tanah abang di jakarta,…nadia do…??”

“Nion ma tanah abang, sude on digoari ma tanah abang, jala dang hea hudok bolak tanokku di jakarta, nandigan i…..”ninna siJatinggil.

Dungi, tuat ma sahalak sian Patas P2 namamolus i, manjonoki nasida, jala didok ma tu ibana “Oi…lae, nandigan do ho sahat tu jakarta on, nga mangoli ninna lae ateh…dia do itoan i, boru aha….Dang manarik ho?”

“Nion do lae…marsitandaan ma hamu…ai aupe naeng manarik do sadarion”ninna si Jatinggil tu donganna songon na serom otik.

“Marbun, dongan ni lae on do, rap makkeneki do hami di patas P2…lao jo lae dah…” ninna dongan na i huhut ma dilojong muse bus Patas P2 i.

Diboto itoan ima na kenek do hape si Jatinggil, jala mercy nanidok ni siJatinggil i hape ima mobil BUS PATAS P2, merek Marcedes, jala na saleleng on diboto itoan i karejo di DepHub ibana, maksudna Kenek dohape. ima kenek ni PPD. Patas P2 na lewat sian Tanah Abang Jakarta.