NAN JATIKKOS

Parsorion ni NanJatikkos, Marende

Di sada luat, dipamasa ma parlumbaan ima lao pariburhon pesta parolopolopon ni negaranta. Somal do ganup bulan ualu dipatupa ulaon on, jala marmassam do parlumbaan on, sian na manortor, marende, markoor, marjalengkat, mar-ball, marlojong, manjangkit nang na asing.

Sogot manogot nunga mangarade NanJatikkos. Ai hos ari annon, madohoti lomba marende ma ibana. Nian dijua ibana do, didok hurang do anggo soarana diparendeon i. Alai, aha ma alus ni amanJatolhas songon parhobas diulaon i?. “Ah, hamu nian ito, sai tor patoruhon do hamu, hape di hurianta pe hamu do song lider” ninna. “Dungi, dang apa maol anggo lagu on, sude do hita umbotosa, alai tutu dison ma tarida boha do halak mamboanton ende i, ai O Tano Batak do” ninna manambai, paposhon rohani NanJatikkos.

Sai dipodahon do tu iba, uju dihametmeton, tung so jadi dohonon goar ni natua-tua, lumobi goar ni tulang, oppung, nantulang, amangbao parumaen/hela nang simatua. “Malala baba” ninna pabiar-biarhon iba. Ala ni poda on ma gabe godang gelar-gelar dihitaan. Oppung Par-Jenggot Ganjang, Tulang Par-Tipi (ala holan on do tulangna nampuna tipi), Simatua ParKebunJeruk –ala maringanan di kebun jeruk.

Ala ni poda on do antong asa sai manjua NanJatikkos. Najolo pe, ditingki singkola ibana dihuta, dang apala olo ibana mangendehon lagu on, alana godang do subangna digoari di endeon.

Dung dapot tingkina, mijur ma ibana tu jolo, tu pentas lao marende. Ala nunga diapil-apil ibana hian, ba dang adong na hurang antong. Gomos do rohana lao marende. Dungi diendehon ma

O tano batak simatuangku, ala simatuana namargoar si Holong, ba tontu pantang do goarion simatua
Sai na martulang do au tu ho, ninna ibana muse. Boha do baenon manjou goar ni tulang niba, si Sihol? sotung malala baba
Dang olo modom dang nok matakku
Sai namarbao  do au, ninna ibana muse huroa goarni amang baona si Lungun.
Sai naeng tu ho

Di pasip ibana jo sangombas, andorang so ditorushon lagu on.

Molo dung bapa mataniari, ninna ibana tung nanget situtu sai hira na dipamasuk tu rohana hata ni ende i, hape na goar ni amangna do si Binsar, nata-nata dia, simatua ni panurat on pe si Binsar do. Alai ginoaran ma sahali-sahali.
Lao mangedai hauma i, dang didok ibana manondangi, ai goar ni edana do si Sondang Marsaulina.
Hahadoli do ngolu siganup ari, tong dang tardoksa goar ni itona sihahaan ima si Godang Martua, ai sitongka do gaor-goaran hula-hula.

Mambahen martulang do au
Sai naeng tu ho
O tano batak andigan amangbao, ninna nanget situtu, pola do habegean tu pudi. Boasa?, huroa goarni amangbaona siangkangan si Sahat, ido-dah, godang do halak batak namargoar on, jala tulang ni panurat on pe ido goarna. Jei sai panggoraon do iba najolo molo nidok “Nga sahat be!”, ingkon “Nga tolhas be!, do”
Helangku, tano hahadiolingki  ai dang tama mandok goar ni helana si Dapot.
O tano batak sai naeng hutatap
au on naeng mian di ho, sambulon ki

Holan sidung ibana marende, tor dilojongkon tu bangkuna, mangupir,  hosa-hosa ibana, diranapi humaliang atik adong angka parsubangonna  umbegesa.